लहान, ३ चैत। उदयपुरमा हावाहुरीका कारण ढलेका रुखले किचेर २ जनाको मृत्यु भएको छ। कटारी नगरपालिका ५ तिनकुनेचोकस्थित राधाकृष्ण मन्दिर नजिक वीरेन्द्र चौधरीको पसलसहितको घरमा नजिकैको सुकेको सालको रुख ढलेर घर किच्दा ६४ वर्षीय वीरेन्द्र चौधरीको र वडा नम्वर ८ थलियाटारमा पनि वर्षासँगै आएको हुरीका कारण रुखको हाँगा भाँचिदा लागेर ४९ वर्षीया मिनामाया तामाङको मृत्युमृत्यु भएको हो।
तामाङ्ग घर नजिकै रहेको गोठबाट खसीबाख्रा घरतर्फ सार्ने क्रममा कुटमिरो रुखको हाँगा भाचिँदा घाइते भएकी थिइन्।
घाइते तामाङलाई उपचारका लागि प्रादेशिक अस्पताल कटारी ल्याइएकोमा चिकित्सकले राति ९ः१० बजे मृत घोषणा गरेका प्रहरीले जनाएको छ।
जिल्ला प्रहरी कार्यालयका प्रहरी प्रमुख एसपी राजन चापागाईंका अनुसार घटनामा चौधरीकी नातिनी अन्दाजी ५ वर्षीया बिनिषा चौधरी, कटारी नगरपालिका ३ आहालडाँडाका २७ वर्षीय युवराज कार्की, वडा नम्पर ५ बलाहाका ४६ वर्षीय लीलाबहादुर दनुवार, सोही स्थानका ४६ वर्षीय प्रेमचन्द्र दनुवार तथा कटारी नगरपालिका १२ बसेरीकी १६ वर्षीया अस्मिता परियार घाइते भएका छन्। घरभित्र थिचिएकी बालिका बिनिषालाई करिब एक घण्टापछि उद्धार गरिएको प्रहरीले जनाएको छ।
घटनाको जानकारी प्राप्त हुनासाथ इलाका प्रहरी कार्यालय कटारीबाट प्रहरी टोली खटिएर उद्धार तथा अनुसन्धान कार्य गरिरहेको जनाएको छ।
