सागर न्यौपाने
काठमाडौं, १५ भदौ। नेकपा एमालेको मधेस प्रदेशमा संगठन र जनमत बलियो छ भन्ने त २०७९ को चुनावी परिणामले देखाइसकेको छ। ८ जिल्ला रहेको मधेसमा एमाले स्थानीय तहको चुनावमा धेरै पालिका जित्ने दोस्रो पार्टी बन्यो। प्रतिनिधि र प्रदेश सभा चुनावमा त सबैभन्दा बढी सिट जितेर मधेसको पहिलो दल नै भयो।
एमाले पोलिटब्युरो सदस्य एवं पूर्वमन्त्री पुरुषोत्तम पौडेल मधेस प्रदेश एमाले राजनीतिको उर्वर भूमि रहेको बताउँछन्।
पौडेलका अनुसार संगठन, कार्यकर्ताको सक्रियताका आधारमा मधेस प्रदेशको रौतहट र बारा जिल्लामा एमालेको प्रभाव बढी छ।
यही ठाउँबाट पूर्वराष्ट्रपति विद्यादेवी भण्डारीले आफ्नो प्रभाव विस्तार थालेकी छन्। बागमती, कोसीमा आफ्नो पक्षमा खुलेका नेता–कार्यकर्ता देखेर उत्साहित भण्डारी अब भने मधेस प्रदेशमा प्रभाव जमाउने दाउमा छिन्।
एमाले विधान महाधिवेशन अगाडि भण्डारी मधेस पुग्नुलाई अर्थपूर्ण रुपमा हेरिएको नेताहरू बताउँछन्।
पार्टी सदस्यता नवीकरण रोकेपछि पनि एमालेमै सक्रिय रहेकी भण्डारी पार्टी निर्णय विरुद्धमा उत्रिएकी छन्। सोही क्रममा शनिबार (भदौ १४) बिहान उनी बारा जिल्ला पुगिन्।
सिमरा विमानस्थलमै उनको स्वागतमा एमालेका नेता कार्यकर्ता झुम्मिए। केहीबेर भेटवार्ता गरेर आफ्ना कुरा राखेपछि भण्डारी वीरगन्ज उद्योग वाणिज्य संघले आयोजना गरेको महिला सम्मेलन उद्घाटन गर्न पर्सातर्फ अघि बढिन्।
जहाँ बारा, पर्सा र रौतहटका ३ सय महिला प्रतिनिधि सहभागी थिए।
भण्डारीले फरक विधाबाट विभिन्न क्षेत्रमा योगदान गरेर छानिएका २५ जना महिलाहरूलाई सोही कार्यक्रममा सम्मान गरिन्।
यद्यपि, सो कार्यक्रम झण्डै महिना दिनपहिले नै तय भएको र भण्डारी पूर्वराष्ट्रपतिकै हैसियतमा सहभागी भएको एमाले पोलिटब्युरो सदस्य पौडेल दाबी गर्छन्।
राजनीतिक सन्देश
भण्डारीले आफू एमालेमा सक्रिय भइसकेको र पछि फर्कने अवस्था नभएको प्रस्टसँग सार्वजनिक रुपमा भनिसकेकी छन्।
यहीकारण अध्यक्ष केपी शर्मा ओलीसँग उनको सम्बन्ध सुमधुर बन्न सकेन। उपाध्यक्ष अष्टलक्ष्मी शाक्यका अनुसार ओली भण्डारीलाई जसरी पनि रोक्न चाहन्छन्।
भदौ २०–२२ सम्म हुने विधान महाधिवेशनका प्रतिनिधिलाई अध्यक्ष ओलीले बालुवाटारमै बोलाएर प्रशिक्षण दिन थालेपछि भण्डारी पनि सकेसम्म पदाधिकारी तहदेखि केन्द्रीय सदस्य र विधान महाधिवेशन प्रतिनिधिलाई भेट्ने योजनामा छिन्।
सोही अनुसार पर्सा गएको बेला उनले मधेसका कम्तीमा चार जिल्लाका नेता–कार्यकर्तासँग भेटिन्।
आफ्नो सदस्यता रोक्ने ओलीको निर्णयविरुद्ध आवाज उठाउनुपर्ने, उमेर हद र दुई कार्यकालको प्रावधानका विषयमा प्रतिनिधिलाई जानकारी गराइन्।
जसकारण मधेसमा छुट्टै खालको माहोल देखिएको एमाले पोलिटब्युरो सदस्य पुरुषोत्तम पौडेल बताउँछन्।
‘उत्साह जगाएको छ। एमालेकै लागि पनि उहाँको आगमनले हित गर्छ,’ पौडेलले नेपालखबरसँग भने, ‘उहाँ एमालेको पक्षमा हुनुहुन्छ। उहाँलाई मधेसले सम्मान ग¥यो। उहाँ एमालेकै लागि जनमत बनाइराख्नुभएको छ। त्यसैको निम्ति काम गरिराख्नुभएको छ। उहाँ एमालेको नेता हो।’
एमालेले सदस्यता नदिए पनि भण्डारीलाई आफ्ना कुरा राख्नको लागि मदन भण्डारी फाउन्डेसन छ। जसको उनी संरक्षक हुन्।
उनी मधेस झर्ने समय पारेर फाउन्डेसनले कार्यक्रम राख्यो। बाराको एउटा गाउँपालिकाका सरकारी सेवामा नाम निकाल्ने एउटै परिवारका चारजना छोरीलाई घरमै पुगेर भण्डारीले सम्मान गरिन्।
पोलिटब्युरो सदस्य पौडेलले भण्डारीको दौडधुपको राजनीतिक अर्थ रहेको बताए। पार्टीले भण्डारीको सदस्यता नवीकरण नगरेर अन्यायपूर्ण व्यवहार गरेको पौडेल बताउँछन्।
‘पार्टी निर्णय जे भए पनि मधेसले भेदभाव गर्दैन, मधेस गुट पनि जान्दैन,’ पौडेलले थपे, ‘कम्युनिस्ट नेताहरुलाई मधेसले सम्मान गर्छ, विद्या भण्डारीको बारेमा मधेस झन् प्रभावित देखियो।’
एमालेको साउन ६ गतेको केन्द्रीय कमिटी बैठकले भण्डारीको सदस्यता नवीकरण नगर्ने निर्णय लिएको थियो।
असार १४ गते काठमाडौँमा मदन भण्डारी जयन्तीको कार्यक्रममा भण्डारीले एमालेमा औपचारिक रुपमा सक्रिय भएको घोषणा गरेकी थिइन्। उनले वैशाखमै आफ्नो सदस्यता नवीकरण समेत भइसकेको खुलाएकी थिइन्। त्यसलगत्तै उनले एक टेलिभिजनलाई अन्तर्वार्ता दिएर आफू एमालेको नेतृत्व गर्नेगरी सक्रिय भएको बताएकी थिइन्।
तर, त्यसपछि एमाले अध्यक्ष केपी शर्मा ओली उनीसँग रूष्ट बने। ओलीले केन्द्रीय कमिटीबाट निर्णय गराएर भण्डारीलाई रोक्न खोजेका छन्।
तर, बागमती, कोसी र सुदूरपश्चिमका केही नेता/कार्यकर्ता उनलाई एमाले सदस्यता दिनुपर्ने पक्षमा उभिन थालेका छन्। आफ्नो पक्षमा माहोल बनाउन भण्डारी मधेस झरेकी हुन्।
महोत्तरीका एमाले केन्द्रीय सदस्य रामदयाल मण्डल पार्टी निर्णयविरुद्ध जान नहुने बताउँछन्। पार्टीलाई पक्ष/विपक्ष समेत बनाउन नहुने उनको भनाई छ।
‘पार्टीको निर्णय सबैले मान्नुपर्छ। सदस्यता नवीकरणको विषय अध्यक्ष र विद्या भण्डारीको कुरा हो,’ उनले भने।
पार्टीले राष्ट्रपति बनाइसकेपछि सम्मानित भएर बस्न मण्डलले भण्डारीलाई सुझाव दिए।
‘मधेस आएर उहाँको पक्षमा माहोल बन्यो कि बनेन भन्न सक्दिनँ। उहाँको पार्टी एउटै हो। एउटै पार्टीमा को पक्ष, को विपक्ष। यहाँ (मधेस) पार्टी यो पक्ष, त्यो पक्ष गर्न भएन,’ उनले थपे।
नेताहरूका अनुसार बारा, रौतहट र सिरहामा एमालेको संगठन बलियो भएको ठाउँ हो। धनुषा र पर्सामा पनि एमाले बलियो छ।
(नेपालखवरबाट)
