लहान, १५ भदौ। सिराहा प्रहरीले ४० ग्राम प्रतिवन्धित लागुऔषधसहित तीन भारतीयसहित चारजनालाई नियन्त्रणमा लिएको छ। भगवानपुर गाउँपालिका १ भगवानपुर चोकबाट ४० ग्राम अवैध लागुऔषध ब्राउनसुगरसहित शनिबार राति प्रहरीले पक्राउ गरेको हो।
पक्राउ पर्नेहरूमा भारत बिहार मधुबनी लौकही पञ्चायत झौहरी ग्राम घोवयाही १ का २४ वर्षीय मो. मिस्टर, २३ वर्षीय मोहमद मुस्तफा, भारत बिहार मधुबनी खुटौना पञ्चायत प्रसाही पुर्वी ग्राम मुरारपट्टि का ३८ वर्षीय अख्तर हुसेन र सप्तरी खडक नगरपालिका ६ का ४२ वर्षीय आविद हुसेन रहेका छन्। अस्थायी प्रहरी पोष्ट भगवानपुरबाट खटिएको प्रहरीले उनीहरूलाई उक्त पदार्थ सहित पक्राउ गरेको हो। साथै उनीहरूले प्रयोग गरेको बिआर ३२ एएक्स १४८३ नम्बरको मोटरसाइकल समेत प्रहरीले बरामद गरेको छ। यस सम्वन्धमा प्रहरीले थप अनुसन्धान गरिरहेको छ।
